Dagur 1 | 17. Nóvember
Áfangastaðir: London, England - Colombo, Sri Lanka

Ferðin hefst á flugi til London Heathrow klukkan 07:35 og lendum þar klukkan 10:50 að staðartíma. Við tökum síðan flug klukkan 20:40 með Sri Lanka Airlines til höfuðborgar Sri Lanka, Colombo, þar sem við lendum klukkan 12:30 að staðartíma 18. Nóvember.

Dagur 2 | 18. Nóvember
Áfangastaðir: Colombo - Negombo

Etir að við höfum lent á flugvellinum í Colombo verðum við sótt og keyrð áleiðis til bæjarins Negombo, á leið okkar þangað munum við sjá fallegt umhverfi, þorp, sveitir og skóga.

Þessa nóttina gistum við á Jetwing Sea Hotel hótelinu eða svipuðu og borðum þar saman kvöldverð.

Dagur 3 | 19. Nóvember
Áfangastaðir: Negombo - Dambulla - Sigiriya Rock Fortress

Við byrjum daginn á því að keyra til Sigiriya sem er í sirka 3,5 klst fjarlægð og tékkum þar inn á hótelið. Sigiriya Rock Fortress er á Heimsminjaskrá UNESCO. Þetta er okkar fyrsta ganga í ferðinni, hún telur um 1200 þrep og tekur um 2-3 klukkutíma í heildina. Ofan á þessum 200 metra háa bjargi er að finna rústir hallar sem eitt sinn stóð þar auk rústa annarra bygginga. Konungurinn Kashyapa reisti stórt hlið úr steini í mynd ljóns og fékk staðurinn nafnið Lion Rock í kjölfarið, hrammar ljónsins standa enn beggja megin stigans við innganginn. Virkið og nærliggjandi umhverfi er á heimsinjaskrá UNESCO og er talið eitt mesta undur Sri Lanka.

Eftir þetta er farið aftur á hótelið okkar sem er Arnaya Lake Dambulla eða svipuðu þar sem við gistum og fáum kvöldmat.

Dagur 4 | 20. Nóvember
Áfangastaðir: Dambulla - Pidurangala  - Dambulla

Við byrjum daginn á yoga tíma og morgunmat. Við keyrum síðan að Pidurangala Sigiri Rajamaha Viharaya hofi sem liggur við rætur fjalls. Hér hefst önnur ganga okkar sem tekur um 2½ - 3 klukkutíma. Við göngum í gegnum framandi frumskóg, yfir kletta og trjárætur að Pidurangala hofinu. Eftir stopp þar tekur við töluvert klifur milli stórra kletta og bjarga þar til við komum að Pidurangala klettinum. Við göngum upp á hann og þaðan njótum við óviðjafnanlegs útsýnis.

Við endum daginn á Amaya Lake Dambulla hótelinu eða svipuðu þar sem við borðum saman kvöldverð.

Dagur 5 | 21. Nóvember
Áfangastaðir: Dambulla - Kandy

Við byrjum daginn á góðum morgunmat og að því loknu keyrum við áleiðis til Kandy sem er sirka 2 klst keyrsla. Í Kandy förum við og skoðum Temple of the Tooth Relic sem talið er geyma tönn úr Buddha.

Eftir þetta tékkum við okkur inn á hótelið okkar sem er Arnaya Hills (eða svipuðu) þar sem við borðum saman kvöldverð.

Dagur 6 | 22. Nóvember
Áfangastaðir: Kandy - Nuwara Eliya

Við byrjum daginn á morgunmat og keyrum svo til Nuwara Eliya sem tekur sirka 2 klst. Skoðunarferð um borgina og eftir það farið aftur á hótelið Frjáls dagur að öðru leyti

Við gistum á Araliya Green Hills eða svipuðu

Dagur 7 | 23. Nóvember
Áfangastaðir: Nuwara Eliya - Horton Plains National Park

Eftir morgunverðinn leggjum við af stað í áhugaverða ferð inn í þjóðgarðinn Horton Plains National Park en hápunktur gönguferðarinnar sem er 9 km í heildina endar á útsýnisstað sem heitir World´s End. Gangan er sirka 1,5 klst hvor leið.

Við gistum áfram Araliya Green Hills eða svipuðu og borðum saman kvöldmat.

Dagur 8 | 24. Nóvember
Áfangastaðir: Nuwara Eliya - Ella - Yala National Park

Við byrjum daginn á morgunmat. Eftir morgunverð tekur við um 2 klukkutíma keyrsla til bæjarins Ella og okkar fjórðu gönguferðar. Á leið okkar til Ella munum við heimsækja te plantekru og bragða á teinu sem er ræktað þar. Gangan er að hluta til klifur sem tekur okkur upp í 2243 metra hæð og tekur í heildina 2-3 klukkutíma. Við göngum að Little Adam's Peak útsýnispallinum en nafnið fær þetta fjall því fjallinu svipar til Sri Pada eða Adam's Peak, heilags fjalls í menningu heimamanna þar sem finna má fótspor Búdda. Gangan sjálf upp á tindinn er ekki mjög erfið og til staðar er merktur göngustígur. Þetta er afar vinsæll áfangastaður sökum hinnar óviðjafnanlegu náttúru sem blasir við gestum.

Þegar við komum niður aftur er stutt keyrsla til Nine Arch Bridge eða "Bridge in the Sky". Brúin er frábært dæmi um járnbrautarbyggingu nýlendutímans og hugvits Englendinganna sem aðstoðuðu heimamenn sem byggðu hana árið 1921. Brúin er um 91 metra löng og tæplega 25 metra há og ef við erum heppin munum við sjá lest fara yfir brúna. Þetta er hiklaust einn af þessum stöðum sem ekki er hægt að heimsækja án þess að taka eins og eina ljósmynd eða svo.

Við endum daginn á ferðalagi til Yala þjóðgarðarins, tæplega 3 klukkutíma keyrsla og margt spennandi að sjá á leiðinni.

Við gistum á Jetwing Yala hótelinu eða svipuðu og borðum saman kvöldverð þar.

Dagur 9| 25. Nóvember
Áfangastaðir: Yala National Park

Við byrjum daginn á yoga tíma og morgunmat. Frjáls dagur eftir það.

Við endum daginn á Jetwing Yala hótelinu eða svipuðu og borðum saman kvöldverð þar.

Dagur 10 | 26. Nóvember
Áfangastaðir: Yala National Park - Galle - Colombo

Við byrjum daginn á morgunmat. Að loknum morgunverði förum við í leiðangur um Yala þjóðgarðinn. Hann er vinsælasti þjóðgarðurinn í Sri Lanka vegna fjölbreytni dýralífsins sem býr þar. Hér eru skriðdýr af öllum toga, framandi fuglar eins og tilkomumiklir ernir og 44 tegundir spendýra. Garðurinn er þekktur fyrir sérlega mikinn fjölda fíla og hlébarða en líkurnar á því að sjá hlébarða eru meiri hér en á nokkrum öðrum stað í heiminum. Þessi dagur gleymist seint!

Næst höldum við til Galle virkisins sem heitir eftir samnefndri borg, keyrslan á milli erum 3 klukkutímar og munum við staldra við á ströndinni á leið okkar þangað þar sem gestum býðst að prufa kókoshnetumjólk. Virkið var upphaflega byggt af Portúgölum árið 1588 og síðar gert upp af Hollendingum þegar þeir tóku það yfir. Í dag er virkið eitt þekktasta sögulega minnismerkið um áhrif byggingarfræði evrópskra nýlendufara frá 16.-19. öld í Suðvestur Asíu. Eftir að hafa skoðað þetta stórfenglega mannvirki tekur við rúmlega 2,5 klukkutíma keyrsla til höfuðborgarinnar Colombo.

Við endum daginn á The Kingsbury hótelinu eða svipuðu.

Dagur 11 | 27. Nóvember
Áfangastaðir: Colombo

Við byrjum daginn á morgunmat og 1½ klukkutíma löngum yoga tíma í Colombo undir handleiðslu heimamanns. Því næst eigum við dekurstund í Spa Ceylon, heilsulind þar sem býðst mikið úrval af allskyns meðferðum og nuddi. Verðlagið er vægast sagt hagstætt miðað við það sem þekkist heima og hverjum og einum frjálst að velja sér það sem þeim hugnast best.

Við endum daginn aftur á The Kingsbury hótelinu eða svipuðu og borðum saman kvöldmat þar. Við hvílum okkur á hótelinu þar til við förum út á flugvöll.

Dagur 12 | 28. Nóvember
Áfangastaðir: Colombo

Við byrjum daginn á morgunmat og förum svo í skoðunarferð um Colombo borgina. Frjáls dagur að öðru leyti.

 Áfram gist á The Kingsbury hótelinu eða svipuðu þar sem við borðum kvöldmat.

Dagur 13 | 29. Nóvember
Áfangastaðir: London, England - Keflavík, Ísland

Keyrslan út á flugvöll tekur um klukkutíma. Flugið okkar er klukkan 02:20 að staðartíma og lendum við á Heathrow flugvelli í London klukkan 08:40.

Heimflugið frá Heathrow er klukkan 20:40 og lendum við á Keflavíkurflugvelli klukkan 23:55 að staðartíma.