Dagur 1 | 15 - 16. Maí

Áfangastaðir: Riga, Lettland | Tbilisi, Georgía

Við fljúgum til Riga í Lettlandi klukkan 00:30 og lendum þar klukkan 07:05 að staðartíma. Áframhaldandi flug til Tbilisi í Georgíu frá Riga er síðan klukkan 23:20 að staðartíma og áætluð lending í Tbilisi klukkan 04:45 að staðartíma.

Við hittum innlenda fararstjórann á flugvellinum í Tbilisi og hann skilar okkur upp á hótel, við fáum síðan frjálsan tíma þar til klukkan 13:00 þegar við förum saman í skoðunarferð um höfuðborgina. Skoðunarferðin byrjar í Metekhi hverfinu sem er elsti hluti borgarinnar. Næst förum við upp með kláf til Narikala virkisins frá fjórðu öld en frá því er stórbrotið útsýni yfir borgina og Mtkvari ána auk þess sem við stöldrum við Mother of Georgia minnismerkið. Síðan röltum við um gamla bæinn þar sem við munum meðal annars sjá Abanotubani súlfúrböðin, en undir þeim eru heitir hverir sem viðhalda hitanum. Samkvæmt þjóðsögunum á fálki Vakhtang Gorgasali, fyrrum konungs Íberíu, að hafa fallið þar til jarðar sem leiddi af sér uppgötvun fyrrnefndra hvera og stofnun borgarinnar.

Við endum daginn á því að borða saman kvöldverð og gistum síðan á Europe Hotel Tbilisi eða sambærilegu hóteli.

Dagur 2 | 17. Maí

Áfangastaðir: Tbilisi, Georgía

Við byrjum daginn á hótelinu með morgunverði. Fyrsti áfangastaður dagsins að honum loknum er Anchiskhati Basilica of St. Mary sem er elsta kirkja borgarinnar og vörslustaður The Miracle Icon of Jesus Christ. Við munum sjá Gabriadze leikhúsið með sínum fallega turni, fyrrum þinghúsið og óperu- og ballethús borgarinnar svo eitthvað sé nefnt.

Næst heimsækjum við Laliashvili Family Wine Cellar þar sem við njótum hádegisverðar og vínsmökkunar saman.

Eftir hádegisverðinn er frjáls tími þar til um kvöldið, hægt er að nota þennan tíma til að slaka á, ganga um borgina og njóta þess sem fyrir augu ber eða versla svo eitthvað sé nefnt.

Við hittumst aftur í lok dags og borðum saman kvöldverð á veitingastað í borginni, við gistum áfram á Europe Hotel Tbilisi eða sambærilegu hóteli.

Dagur 3 | 18. Maí

Áfangastaðir: Tbilisi, Georgía | Mtskheta, Georgía | Chardakhi, Georgía | Gudauri, Georgía

Við byrjum daginn á hótelinu með morgunverði áður en við leggjum land undir fót og ferðumst til Mtskheta. Þessi borg er ein sú elsta í landinu og var höfuðborg konungsveldis Íberíu á sínum tíma. Við heimsækjum einnig Jvari klaustrið sem byggt var á sjöttu öld og er á heimsminjaskrá UNESCO.

Okkar næsti áfangastaður er Svetitskhoveli Cathedral sem er önnur stærsta kirkja Georgíu og samkvæmt þjóðsögunni hafði íbúi frá Mtskheta verið viðstaddur krossfestingu Jesú og keypt serk hans af rómverskum hermanni í kjölfarið. Þegar hann kom með serkinn aftur í heimabyggð ákvað systir hans að snerta hann og lést samstundis. Ekki var hægt að losa serkinn úr höndum hennar og hún því grafin með honum og er sú gröf varðveitt í dómkirkjunni.

Næst ferðumst við til þorpsins Chardakhi þar sem við borðum saman þjóðlegan hádegisverð að hætti heimamanna og eigum notalega stund í vínsmökkun.

Við endum daginn á því að keyra til fjallaþorpsins Gudauri, sem er þekktasti og vinsælasti skíðastaður Georgíu þar sem við borðum saman kvöldverð og gistum á Best Western Gudauri Hotel eða sambærilegu hóteli.

Dagur 4 | 19. Maí

Áfangastaðir: Stepantsminda, Georgía | Tbilisi, Georgía

Dagurinn hefst með morgunverði á hótelinu okkar. Við byrjum dagskrá dagsins í faðmi Kákasus fjallanna þar sem við skoðum minnismerki frá 1983 sem var byggt til að fagna samvinnu Rússlands og Georgíu, undir merkjum Sóvetríkjanna. Að því loknu höldum við til fjallaþorpsins Stepantsminda sem hefur verið kallaður einn fallegasti smábær heimsins og þar njótum við óviðjafnanlegs útsýnis yfir Kákasusfjöllin. Gergeti Trinity Church er okkar næsta stopp sem hefur einmitt verið kölluð fallegasta kirkja í heimi og það af The Daily Telegraph. Í Stepantsminda munum við bæði fá kennslu og tækifæri til að taka þátt í gerð handverks úr ull - á gamla mátann.

Við borðum saman hádegisverð og fáum kennslustund í gerð Khinkali, fylltar deigbollur eða “dumplings” - þessi réttur er talinn vera einn af þjóðarréttum Georgíu.

Dariali Father Monastery Complex er okkar næsta stopp sem er samansafn af nokkrum kirkjum og státar af glæsilegum vínkjallara. Prestarnir framleiða hér sitt eigið vín og munum við fá að bragða á þeim í vínsmökkun.

Við heimsækjum einnig Zhinvali þar sem við ætlum að heimsækja Ananuri kastalann og virki. Kastalinn hefur séð margar orustur en sú þekktasta var árið 1739 þegar að óvinveittur hertogi, Shanshe Ksani, réðist til atlögu og kveikti í honum eftir að hafa unnið bardagann.

Við keyrum aftur til Tbilisi þar sem við endum dagskrá dagsins á heimsókn í súlfúrböð og borðum ljúffengan kvöldverð á einu þekktasta veitingahúsi borgarinnar, Mtsvadiauri.

Við gistum á Europe Hotel Tbilisi eða sambærilegu hóteli.

Dagur 5 | 20. Maí

Áfangastaðir: Kakheti, Georgía | Telavi, Georgía | Tsinandali, Georgía | Kvareli, Georgía | Tbilisi, Georgía

Morgunverður á hótelinu. Þennan daginn förum við í dagsferð til Kakheti héraðsins sem er eitt það áhugaverðasta í Georgíu en það býr yfir mikilli náttúrufegurð, mörgum klaustrum, góðum mat og ríkri sögu - hér eru yfir 5000 sögulegar byggingar og munir auk þekktustu víngerðar landsins. Næst förum við til Telavi bæjar við rætur Tsiv-Gombori fjallgarðsins í miðju Kakheti héraðs. Við borðum hádegismat í Telavi og förum síðan í vínsmökkun í Shumi víngerðina. Í bænum má finna 900 ára gömul tré sem eru eitt af þekktari einkennum bæjarins.

Okkar næsti áfangastaður er þorpið Tsinandali þar sem við skoðum Alexander Chavchavadze safnið en hann Alexander var georgískur aðalsmaður sem þjónaði í her rússneska keisaradæmisins sem hershöfðingi. Hann er talinn vera eitt af áhrifamestu skáldum Georgíu og hefur jafnan verið kallaður faðir rómantískrar ritstefnu í landinu. Hann var sá fyrsti til að hefja framleiðslu á víni í héraðinu auk þess sem hann safnaði fágætu víni og munum við fá að skoða vínkjallara safnsins og smakka eitt vín. Safnið er í raun samansafn af húsum þar sem má finna víngerð, hótel, safn og kaffihús, allt umlukið glæsilegum garði.

Við förum næst til bæjarins Kvareli þar sem við skoðum Gremi, sem samanstendur af kastala sem var áður höfuðborg Kakheti konungsveldisins og glæsilegri kirkju sem var byggð af konungi Kakheti, Levan, árið 1565. Þessi kirkja heitir The Church of the Archangels og er eitt besta dæmi um georgískan arkitektúr frá miðöldum.

Við endum skoðunarferðina á stað sem heitir The Wine Yard # 1 og heimsækjum fjölskylduna sem rekur vínekruna, fáum að kynnast þeim og venjum og siðum heimamanna. Bæði kynnumst við brauð- og víngerð þar sem við fáum kennslustund í matargerð, við lærum að matreiða brauð Churchkhela sem er þjóðlegt bakkelsi og snæðum síðan kvöldverð hjá fjölskyldunni.

Við endum daginn aftur í Tbilisi þar sem við gistum á Europe Hotel Tbilisi eða sambærilegu hóteli.

Dagur 6 | 21. Maí

Áfangastaðir: Fioletovo, Armenía | Dilijan, Armenía

Nú förum við til Armeníu þar sem okkar fyrsta stopp er Haghpat klaustrið sem var líklegast byggt árið 936 af Khosrovanuysh drottningu, eiginkonu Ashot III, konungi Armeníu á þeim tíma. Klaustrið er tilkomumikið og kemur því ekki á óvart að það sé á heimsminjaskrá UNESCO. Við borðum saman hádegisverð hér.

Eftir hádegisverðinn höldum við til Dilijan og á leið okkar þangað munum við staldra við í Fioletovo sem er þekkt Molokan þorp. Það fólk sem kallar sig Molokan er rússneskur minnihlutahópur íbúa Armeníu. Hér hittum við fjölskyldu sem býr á svæðinu og tökum þátt í hefðbundnu teboði þar sem meðlimir fjölskyldunnar segja frá sögu þeirra og hefðum. Eftir þessa heimsókn höldum við til bæjarins Dilijan sem er staðsettur í Dilijan þjóðgarðinum og er þekktur fyrir heilsulindir sínar og fagmannlegt handverk. Tilvalinn staður til að kaupa minjagrip!

Í Dilijan heimsækjum við aðra fjölskyldu, kynnumst þar Armensku bakkelsi, gata, og borðum hefðbundinn armenskan kvöldverð. Við gistum í Dilijan á Haghartsin Hotel eða sambærilegu.

Dagur 7 | 22. Maí

Áfangastaðir: Selim Pass, Armenía | Noravank Monastery, Armenía | Yerevan, Armenía

Morgunverður á hótelinu. Eftir morgunverð förum við meðfram Sevan vatni og áfram út Sevan-skaga þar til við komum að Sevanank klaustrinu þar sem við njótum dásamlegs útsýnis yfir vatnið og umhverfið í kring. Við snæðum hádegisverð með heimamönnum í heimahúsi en þar er starfræktur ostabúgarður og munum við fá kynningu á hvernig framleiðslan virkar og njótum osta- og vínsmökkunar. Eftir hádegið förum við um Selim Pass, þekktan áningarstað sem kaupmenn og ferðalangar nýttu sér á öldum áður á ferð sinni um Silkiveginn. Á göngu okkar munum við sjá Bezoar geitur, eina af dýrategundum Armeníu sem því miður eru í útrýmingarhættu.

Við munum síðan skoða Noravank klaustrið frá 13. öld sem var byggt í þröngu gili. Hér rennur Amaghu áin og við njótum þess að sjá fallegt samspil náttúru og manns áður en við borðum hádegismat á svæðinu.

Við endum daginn á því að keyra til Yerevan þar sem við borðum kvöldmat og gistum á Ani Plaza Hotel eða sambærilegu.

Dagur 8 | 23. Maí

Áfangastaðir: Yerevan, Armenía

Morgunverður á hótelinu. Yerevan er áfangastaður dagsins - eftir morgunmat förum við í skoðunarferð um þessa glæsilegu borg og skoðum það allra helsta. Við munum skoða Republic Square og "steinteppið" sem liggur á því miðju. Það er í raun hellulagt listaverk en útliti þess er ætlað að líkja eftir hefðbundnu armensku teppi. Við munum einnig koma við í óperu- og ballethúsi borgarinnar sem arkitektinn Alexander Tamanian hannaði. Við munum njóta útsýnis yfir alla borgina og Ararat fjall frá toppi Cascade minnismerkisins, við heimsækjum Cafesjian listasafnið sem geymir flóru armenskrar nútímalistar, Gumi Shuka sem er sölutorg þar sem má finna mikið af spennandi kræsingum og skoðum einnig Mother Armenia minnismerkið áður en við fáum okkur hádegisverð.

Eftir hádegisverðinn förum við í heimsókn til Matenadaran sem er safn og geymslustaður fyrir meirihluta fornra armenskra handrita sem til eru. Safnið er svo vel þekkt að nafnið Matenadaran er jafnan notað um önnur söfn víðsvegar um heiminn sem geyma armensk handrit. Einnig heimsækjum við Yerevan Brandy Company og fáum að smakka víðfrægt armenskt brandí eða koníak þeirra.

Dagurinn endar í Yerevan þar sem við njótum kvöldverðar með sýningu á þjóðdönsum. Við gistum í Yerevan á Ani Plaza Hotel eða sambærilegu.

Dagur 9 | 24. Maí

Áfangastaðir: Yerevan, Armenía | Geghard Monastery, Armenía | Garni Pagan, Armenía | Tbilisi, Georgía

Dagurinn hefst með morgunverði á hótelinu okkar. Næst heimsækjum við Geghard klaustrið sem er á heimsminjaskrá UNESCO, skammt frá Yerevan. Það var reist á miðöldum og er að hluta til grafið inn í bergið sem klaustrið stendur við. Það er til þjóðsaga um lækningarmátt lindar sem finna má innan veggja klaustursins en hún heldur því fram að jafnvel einn sopi af vatni úr lindinni geti læknað alla sjúkdóma.

Frá Geghard förum við til Garni Pagan hofsins frá 1. öld sem er eina síðgríska hofið í Kákasusfjöllunum sem stendur enn í dag. Arkitektúr hofsins er í anda Meyjarhofsins í Aþenu og er tilgangur hofsins enn óskýr, sagnfræðingar eru óvissir um hvort það hafi verið bænastaður eða mögulega grafhvelfing. Við borðum hádegisverð á svæðinu og fáum kennslu í bakstri á lavash brauði. Við endum dagskrá dagsins á því að keyra til Symphony of Stones sem er hluti af Garni gljúfri áður en við endum daginn á að keyra að landamærum Armeníu og Georgíu þar sem við borðum kvöldmat og náum að hvílast aðeins á hóteli áður en við höldum út á flugvöll.

Dagur 10 | 25. Maí

Áfangastaðir: Riga, Lettland | Keflavík, Ísland

Flugið okkar frá Tbilisi til Riga er klukkan 02:20 að staðartíma og við lendum klukkan 05:45 að staðartíma. Síðan fljúgum við til Íslands klukkan 22:45 að staðartíma og lendum heima klukkan 23:40 að staðartíma.