Skoðunarferð Um Valletta

Í þessi skoðunarferð um Valletta heimsækjum við St. John’s Co-Cathedral sem var reist undir lok sexándu aldar sem kirkja fyrir Mölturiddarana, hún er ekki einungis mest heimsótta kirkja Möltu heldur er hún einnig sú glæsilegasta. Tilkomumikið kirkjuloftið og myndverk, gylltir bogar og verk eftir Mattia Preti eru hluti af glæsilegri arfleið barokk-tímans. Marmaragólf kirkjunnar er þakið stórfenglegum legsteinum til minningar um ýmis mikilmenni Mölturiddaranna sem sofa þar sínum hinsta svefni. Innar í kirkjunni er mesti dýrgripur kirkjunnar, olíumálverkið The Beheading of St John the Baptist eftir meistarann Caravaggio sem er talið hans besta verk og eitt það mikilvægasta í vestrænni listasögu. Caravaggio var í kjölfarið gerður að meðlimi reglunnar en örfáum mánuðum síðar var hann rekinn með skömm úr reglunni þar sem hann hafði gerst brotlegur við lög hennar og átti sá brottrekstur sér stað fyrir framan málverkið sem hann hafði skapað fyrir regluna, að honum fjarverandi. Við endum heimsókn okkar á safni kirkjunnar þar sem okkur gefst kostur á að skoða silfurbúnað, skreytt ofin veggtjöld og aðrar gersemar.

Næst munum við sjá og fræðast um þann hluta borgarinnar sem leynist neðanjarðar. Borgin var upphaflega byggð sem virki og undir henni er að finna stórt og mikið gangakerfi með geymslurýmum sem gerðu verjendum Valletta kleift að verjast árásum erlendra afla allt frá miðöldum til seinni heimsstyrjaldar þegar íbúar leituðu skjóls þar undan sprengjuárásum.

Skoðunarferðin endar með heimsókn á fornleifasafn borgarinnar þar sem okkur gefst tími til að skoða hina ómetanlega muni sem þar er að finna.

Lengd | Fjórar klukkustundir.

Verð | Birt síðar.

| Dagsetning skoðunarferðar verður birt síðar |

Eyjan Gozo 

Gozo er töfrandi eyja skammt frá Möltu og munum við sigla til hennar með ferju. Aðkoman er hin glæsilegasta, þegar við siglum inn hafnarmynnið tekur á móti okkur friðsæl höfnin og snotur kirkja sem trónir yfir henni.

Eyjan er um 67 km² að stærð og þar búa rétt um 34.000 manns. Gozo er þekkt fyrir afslappað andrúmsloft og margir heimamenn lýsa henni á þann veg að hún sé eins og Malta var á árum áður. Margir vilja meina að tíminn líði hægar á Gozo en annarsstaðar í heiminum.

Sjarmi eyjunnar er margþættur - gróskumikið landslagið teygir sig um eyjuna alla og bæði landbúnaður og fiskveiðar spila stórt hlutverk í daglegu lífi eyjaskeggja. Saga eyjunnar er hluta til goðsagnakennd, talið er að eyjan gæti verið hin dularfulla en friðsæla Calypso úr Ódysseifskviðu Hómers.

Þennan dag fá gestir tækifæri til að upplifa sumar af þekktustu hefðum eyjunnar sem byrjar á bátsferðinni frá Möltu. Okkar fyrsti áfangastaður er Ta Massar vínekran þar sem við smökkum afurðir frá eyjunni og fáum kynningu á framleiðsluferlum vínekrunnar.

Þaðan förum við til Marsalforn þar sem heimamenn verka salt en saga þessa iðnaðar á Gozo nær aftur til tíma Mölturiddaranna. Meðfram Norður-strönd Gozo sjáum við þessi 350 ára gömlu lón teygja sig meðfram strandlengjunni um 3 kílómetra leið. Þetta er ekki einungis áhugaverð sjón því þau eru hluti af menningu eyjunnar og hafa sumar fjölskyldur starfað við saltframleiðsluna í margar kynslóðir.

Á leið okkar þangað munum við einnig skoða Basilica of the National Shrine of the Blessed Virgin of Ta' Pinu sem var byggt á milli áranna 1920-1931. Ta Pinu er byggingarlistaverk með meiru, það er tilkomumikið ásýndar að utan og ekki síðra að innan með höggmyndum og glæsilegu handverki úr Maltnesku bergi. Helgistaðurinn var reistur fyrir framan kapelluna sem stóð þar upphaflega en hana átti að rífa árið 1575 að beiðni Pietro Dusina sem kom þangað á vegum Gregory XIII páfa en sagan segir að verkamaðurinn sem tók fyrsta (og eina) höggið hafi handleggsbrotnað við það. Var það túlkað sem fyrirboði um að kapellan ætti ekki að vera rifin og varð hún því sú eina á eyjunni sem var ekki eyðilögð.

Við altari kirkjunnar má enn finna málverkið Assumption to Heaven of Our Lady sem sagan segir að hafa talað til kotbóndans Karmni Grima í Júní árið 1883 og varð eftir það þekkt sem helgiskrín tileinkað Maríu Mey og enn þann dag í dag kemur mikill fjöldi fólks í pílagrímsferð hingað.

Fjórtán marmarastyttur liggja upp Ghammar hæðina gagnstætt kirkjunni sem tákna Via Crucis - sem sýna þrautagöngu Jesú Krists er hann gekk upp Calvary fjall til krossfestingar sinnar.

The Azure Window eða Dwejra Window var 28 metra hár náttúrulegur bogi úr bergi sem hafði staðist tímans tönn þar til 2017 þegar að hann brotnaði í stormi. Við munum staldra við þar og kynna okkur Dwejra flóann og aðliggjandi svæði sem er sannkallaður griðastaður stórbrotinnar náttúru.

Boginn hafði komið við í kvikmyndum og sjónvarpsþáttum á borð við kvikmyndina The Count of Monte Cristo og þættina Game of Thrones áður en hann skemmdist í storminum og var það gríðarlegur missir fyrir Maltverja.

Þrátt fyrir að boginn hafi sundrast þá er hann enn mjög vinsæll áfangastaður fyrir ferðamenn. Hér finnum við einnig The Blue Hole sem er náttúrulega mótað lón við sjóinn og tengist honum í gegnum neðanjarðargöng. Þetta er einn vinsælasti áfangastaðurinn í Evrópu fyrir kafara þar sem fegurðin undir yfirborðinu er óviðjafnanleg.

The Inland Sea er smár einangraður flói við Dwejra sem tengist sjónum í gegnum 80 metra löng náttúruleg göng en dýptin er allt frá 6 metrum í 25 metra þegar komið er út að sjónum. Það er ótrúlega fallegt sjónarspil þegar sólin skellur á djúpbláu hafinu sem lifir í minningunni þegar heim er komið.

Við snæðum saman síðbúinn hádegisverð á eyjunni.

Lengd | Níu klukkustundir.

Verð | 26.200KR

| Dagsetning skoðunarferðar verður birt síðar |

Mosta, Mdina & Rabat

Við byrjum daginn á heimsókn til Mosta Dome. Þessi glæsilega kirkja geymir mikinn fjölda málverka eftir Giuseppe Cali og aðra hæfileikaríkra málara. Þegar kirkjan er heimsótt er tilvalið að ganga inn í sjálfan helgidóminn og skoða hinn mikla fjölda af munum sem eru til sýnis þar, þar á meðal fyrrnefnd málverk og líkan af kirkjunni auk eftirgerðar af sprengju sem fór í gegnum þakið og gróf sig í kirkjugólfið án þess að springa.

Mdina, sem gengur undir nafninu The Silent City, situr efst á hæð með útsýni yfir marga af bæjunum umhverfis hana. Þessi borg er óvenjuleg blanda af miðaldar borgarvirki og barokk-byggingarlist. Forðum daga bjuggu þar aðallega fjölskyldur af aðalsættum og mörg heimilin hér hafa erfst í margar kynslóðir og er búseta í þeim enn tengd við auðæfi. Þessi híbýli eru jafnan gríðarstór að innan en lítilfjörlegir inngangar blekkja augað áður en inn er komið. Gælunafnið fékk borgin sökum hljóðlátra stræta hennar og strangra laga um notkun bifreiða, þessi fjarvera vélarhljóða getur jafnvel gert gestum kleift að ímynda sér að þeir hafi ferðast aftur í tíma.

Inngangurinn að borginni heitir Mdina Gate eða Vilhena Gate. Hliðið var hannað í barokk stíl af hinum franska arkítekt og hernaðarverkfræðing Charles François de Mondion sem tilheyrði reglu Mölturiddaranna. Nafn hliðsins var valið til heiðurs stórmeistara reglunnar, António Manoel de Vilhena.

Við munum ganga um stórmerkileg stræti sem hafa lítið breyst síðan á miðöldum, umkringd virkisveggjum og fornum byggingum. Það er einstök upplifun að rölta um borgina og sjá það sem fyrir augu ber eins og Siculo-Norman höllina og svipaðar byggingar í barokk-stíl sem hafa mikið sögulegt gildi - auk hinnar fjölbreyttu flóru annarra byggingarstíla. Þessi hrífandi miðaldablær er ástæða þess að borgin er sannkölluð paradís fyrir kvikmyndagerð.

Við komum til með að heimsækja St. Paul’s Cathedral, þessi kirkja var hönnuð af Lorenzo Cafa og er hún sérlega tilkomumikil. Hún er mest áberandi byggingin í miðri Mdina þrátt fyrir að vera umkringd fleiri glæsilegum byggingum.

Seinasti áfangastaður dagsins er hinn aðliggjandi bær Rabat sem meðal annars er heimili St. Paul’s Catacombs. Katakombur eða grafhýsi af þessum toga í Mdina þróuðust út frá einföldum gröfum sem voru höggnar í bergið fyrir upphaf okkar tímatals.

Lengd | Fjórar klukkustundir.

Verð | 14.300KR

| Dagsetning skoðunarferðar verður birt síðar |

Þjóðlegur Kvöldverður & Vínsmökkun

Þjóðlegur kvöldverður á veitingastað þekktrar vínekru nærri Valletta þar sem framreitt er heilgrillað svín auk meðlætis og víni framleiddu á staðnum.

Lengd | Fimm klukkustundir.

Verð | 25.000KR

| Dagsetning skoðunarferðar verður birt síðar |