Dagur 1 - 2 | 4 - 5. Október
Áfangastaðir: Riga, Lettland | Dubai, Sameinuðu Arabísku Furstadæmin | Ras Al Khaimah, Sameinuðu Arabísku Furstadæmin
Ferðin hefst á flugi með íslenska fararstjóranum okkar frá Keflavík klukkan 12:30 til Riga í Lettlandi þar sem við lendum klukkan 19:05 á staðartíma. Förum með sama flugfélagi frá Riga klukkan 00:05 til Dubai og lendum þar klukkan 07:55 á staðartíma. Við förum upp á hótel þar sem við getum hvílst eftir ferðalagið og borðum saman morgunverð á leiðinni þangað. Frjáls tími það sem eftir er af degi og kvöldverður á hótelinu. Gistum á Radisson Resort Ras Al Khaimah Marjan Island.

Morgun- og kvöldverður innifalinn.

Dagur 3 | 6. Október

Áfangastaðir: Ras Al Khaimah, Sameinuðu Arabísku Furstadæmin | Jebel Jais, Sameinuðu Arabísku Furstadæmin

Byrjum daginn á morgunverði á hótelinu áður en við höldum af stað í skoðunarferð um Ras Al Khaimah svæðið og kynnumst sögu þess. Meðal þess sem við sjáum eru bærinn Al Jazirah Al Hamra þar sem við sjáum fjölmörg dæmi um forna byggingalist landsins og Dhayah Fort virkið frá bronsöld.

Næst förum við til Jebel Jais fjallsins sem er það hæsta í landinu og borðum hádegisverð saman á veitingastaðnum 1484 by PURO við tind fjallsins. Veitingastaðurinn er í 1,484 metra hæð yfir sjálvarmáli og fær nafn sitt þaðan.

Við endum daginn á hótelinu okkar, frjáls tími það sem eftir er af degi og kvöldverður á hótelinu. Gistum á Radisson Resort Ras Al Khaimah Marjan Island.

Morgun-, hádegis- og kvöldverður innifalinn.

Dagur 4 | 7. Október

Áfangastaðir: Sharjah, Sameinuðu Arabísku Furstadæmin | Dubai, Sameinuðu Arabísku Furstadæmin

Morgunverður á hótelinu áður en við förum af stað til Dubai. Á leiðinni munum við heimsækja borgina Sharjah og fara í skoðunarferð um hana. Við munum fara og skoða Souq Al Arsah markaðinn sem er einn sá elsti sinnar tegundar í landinu, hér er hægt að finna magnað handverk og fallega muni. Við skoðum einnig markaði sem selja grænmeti, ávexti og sjávarfang. Við munum fræðast um sögu borgarinnar og stöðu hennar í íslamskri menningu þegar við förum í safnið Sharjah Museum of Islamic Civilization.

Við endum daginn á hótelinu okkar í Dubai, frjáls tími það sem eftir er af degi og kvöldverður á hótelinu. Gistum á Signature 1 Hotel.

Morgun- og kvöldverður innifalinn.

Dagur 5 | 8. Október

Áfangastaðir: Dubai, Sameinuðu Arabísku Furstadæmin | Eyðimerkur-safarí

Byrjum daginn á morgunverði á hótelinu. Ógnarháir skýjakljúfar og nútímalegar byggingar sem hafa risið í eyðimörkinni er það sem Dubai er einna þekktust fyrir í dag. Gamli borgarhlutinn er mjög spennandi og gömlu hefðirnar hafa varðveist vel þar. Við munum skoða eitt elsta hverfi borgarinnar, Al Bastakiya og Al Fahidi hverfið. Við munum meðal annars ferðast með leigubát, svokölluðum Abra sem heur ferjað heimamenn þvert um Dubai í áratugi, röltum um souq markaði og heimsækjum Jumeirah moskuna. Förum síðan upp á hótel.

Seinni partinn höldum við á vit ævintýranna i eyðimerkur-safarí, þetta er upplifun sem ekki er hægt að láta framhjá sér fara í ferð sem þessari. Við verðum sótt á hótelið af fjórhjóladrifnum jeppum og keyrð út í eyðimörkina þar sem gullnar sandöldur ná svo langt sem augað eygir. Okkur gefst tækifæri á að fara á bak úlföldum, fyrir þá sem það vilja. Við heimsækjum búðir Bedúína þar sem við snæðum kvöldmat og njótum skemmtiatriða að hætti heimamanna. Gistum á Signature 1 Hotel.

Morgun- og hádegisverður innifalinn.

Dagur 6 | 9. Október

Áfangastaðir: Dubai, Sameinuðu Arabísku Furstadæmin

Við byrjum daginn á morgunverði á hótelinu. Dubai er í dag mjög nútímaleg borg. Við skoðum þessa einstöku borg og kynnumst daglegu lífi heimamanna. Við komum til með að skoða hafnarsvæðið og förum inn í hæstu byggingu heims - Burj Khalifa, sem er 830 metra hár skýjakljúfur. Í heimsókn okkar þangað förum við alla leið upp á 124. hæð og upplifum einstakt útsýni yfir borg og land. Við munum síðan hafa frjálsan tíma þar sem fólki gefst kostur á að skoða sig um í Dubai Mall og snæða hádegisverð, mikið úrval af spennandi veitingastöðum þar. Við förum síðan upp á hótel þar sem við getum hvílst og undirbúið okkur fyrir kvöldsiglingu meðfram ströndinni og kvöldverð um borð. Gistum á Signature 1 Hotel.

Morgun- og kvöldverður innifalinn.

Dagur 7 | 10. Október

Áfangastaðir: Jabreen Castle, Oman | Nizwa, Oman

Eftir morgunverð höldum við yfir landamæri Oman til borgarinnar Nizwa. Nizwa er ævaforn borg umkringd pálmatrjám sem státar af einstökum arkitektúr en hún var höfuðborg landsins á 6. og 7. öld. Við munum skoða það helsta verður á vegi okkar, meðal annars Nizwa virkið frá 17. öld og markaðinn Nizwa Souq þar sem má finna allt á milli himins og jarðar eins og silfurmuni, ávexti, grænmeti og fleira. Við fáum að sjá hvernig daglegu lífi hér er háttað.

Næst ferðumst við til Jabreen kastalans sem var reistur á 17. öld og er almennt talinn vera ein fallegasta bygging Oman. Áður fyrr var hann jafnfram miðstöð menntunar á þessu svæði.

Seinasti áfangastaður dagsins er Bahla virkið, það fyrsta sinnar tegundar sem var byggt í arabískum stíl í Oman. Við stoppum hér og okkur gefst ostur á að taka myndir áður en við keyrum á hótelið okkar þar sem við borðum kvöldverð. Við gistum á Falaj Daris Hotel.

Morgun- og kvöldverður innifalinn.

Dagur 8 | 11. Október

Áfangastaðir: Al Hamra, Oman | Misfah, Oman | Wadi Bani Habib, Oman | Jebel Akhdar, Oman

Við byrjum daginn á morgunverði á hótelinu. Áður en við höldum frá Nizwa heimsækjum við nautgripa-markað sem er haldinn á Föstudögum í borginni. Eftir að við höfum skoðað hann liggur leið okkar upp í fjöllin að bænum Al Hamra þar sem hús úr hlöðnum leir og steinilagðar götur láta okkur líða líkt og við höfum ferðast aftur í tímann. Næst heimsækjum við bæinn Misfah og sjáum hvernig Aflaj vatnsveitukerfi heimamanna virkar, sem gerir þeim kleift að rækta grænmeti og ávexti sem jafnan er ekki gerlegt í eyðimörkinni.

Við endum daginn á að heimsækja þorpið Wadi Bani Habib sem er í 2,000 metra hæð yfir sjávarmáli og þar af leiðandi er loftslagið töluvert ólíkt því sem annars þekkist í Oman, sumarið ekki jafn heitt og yfir vetrartímann fer hitastigið undir frostmark.

Við endum daginn á hóteli í Jebel Akhdar fjöllunum þar sem við borðum kvöldverð saman. Gist er á Sama Hotel Jabal Al Akhdar.

Morgun- og kvöldverður innifalinn.

Dagur 9 | 12. Október

Áfangastaðir: Birkat al Mauz, Oman | Wahiba Sands, Oman

Við byrjum daginn á morgunverði á hótelinu. Við förum í gönguferð um svæðið og kynnumst lifnaðarháttum heimamanna. Við rætur Jebel Akhdar fjalla er að finna þorpið Birkat al Mauz sem er hvað þekktast fyrir afkastamikla bananarækt, múrsteinsvirki og 17. aldar mosku sem gefa þorpinu sérstakan blæ.

Við keyrum niður fjallið að Wahiba Sands, þekktustu eyðimörk landsins þar sem við munum fræðast betur um líf Bedúína hirðingjanna, sjáum heimili þeirra og fáum okkur kaffi og döðlur að þeirra sið. Við endum daginn í tjaldbúðum þeirra og upplifum sólsetrið í eyðimörkinni.

Þeir sem hafa áhuga á að bæta við upplifun eins og að fara á bak úlfalda geta keypt slíkar upplifanir í tjaldbúðunum. Gistum nóttina í tjaldbúðum Arabian Oryx Camp.

Morgun- og kvöldverður innifalinn.

Dagur 10 | 13. Október

Áfangastaðir: Wadi Bani Khalid, Oman | Muscat, Oman

Við byrjum daginn á morgunverði á hótelinu. Þennan daginn förum við til Wadi Bani Khalid sem er friðsæl eyðimerkurvin með laug af hressandi, kristaltæru vatni umkringt klettum og döðlu- og bananatrjám. Hér fáum við stund til að synda í vatninu [Sundbolir leyfðir - ekki bikiní]. Einnig skoðum við Wadi Tiwi, djúpt og þröngt gil sem liggur í gegnum fjöllin til sjávar og Finns Beach ströndina með hvítum sandi og og rafbláum sjó.

Næst höldum við til Bimmah Sinkhole, annars náttúruundurs - kalksteinsgígur sem myndaðist þegar nálægt fjall hrundi, svæðið fylltist af sjó og myndaði náttúrulega vin.

Við gistum á Radisson Blu Hotel Muscat og snæðum saman kvöldverð þar.

Morgun- og kvöldverður innifalinn.

Dagur 11 | 14. Október

Áfangastaðir: Muscat, Oman |

Eftir morgunverð skoðum við menningarborgina Muscat. Þessi fagra borg liggur að Omanflóa og er umlukin fjöllum og eyðimörk. Sultan Qaboos moskan er okkar fyrsti viðkomustaður, vægast sagt sannkölluð arkitektúr meistarasmíði sem við skoðum áður en við förum til Kongunglega Óperuhússins í miðbænum, þessi bygging gefur höllinni lítið eftir hvað varðar glæsileika.

Við heimsækjum einnig Mutrah Souq markaðinn sem er þekktastur fyrir fallegt og vandað handverk úr silfri sem og aðra minjagripi, hér er hægt að gera góð kaup.

Við heimækjum einnig þorpið Sidab sem er einskonar úthverfi Muscat borgar og kynnumst þar hópi kvenna, Sidab Women Group, sem býður upp á kynningu á menningu og siðum lands og þjóðar. Þar gefst okkur kostur á að blanda geði við heimamenn, lært meira um Oman og smakkað hefðbundinn mat og drykki heimamanna. Hér getum við einnig keypt fallega og litríka muni og klæðnað sem er handunnið af meðlimum hópins.

Við gistum á Radisson Blu Hotel Muscat og snæðum saman kvöldverð þar.

Morgun- og kvöldverður innifalinn.

Dagur 12 | 15. Október

Áfangastaðir: Muscat, Oman

Við byrjum daginn á morgunverði á hótelinu. Þessi dagur er verslunardagur í Muscat, okkur gefst tækifæri til að heimsækja hina fjölmörgu markaði borgarinnar eins og Muttrah Souq, einn elsti markaður sinnar tegundar í heiminum og Mall of Oman verslunarmiðstöðina, þar er einnig hægt að fara á einhvern af veitingastöðunum, kíkja í bíó eða skoða sig um.

Við gistum á Radisson Blu Hotel Muscat og snæðum saman kvöldverð þar.

Dagur 13 | 16. Október

Áfangastaðir: Dubai, Sameinuðu Arabísku Furstadæmin

Við byrjum daginn á morgunverði á hótelinu áður en við ferðumst til Dubai, ferðalagið tekur um 5 - 6 klukkutíma og við munum koma við í bæ á leiðinni þar sem þeim sem það vilja gefst tækifæri á að borða hádegisverð.

Eftir að við höfum skráð okkur inn á hótelið í Dubai er frjáls tími það sem eftir lifir dags, við borðum saman kvöldverð á hótelinu. Gistum á Signature 1 Hotel.

Morgun- og kvöldverður innifalinn.

Dagur 14 | 17. Október

Áfangastaðir: Abu Dhabi, Sameinuðu Arabísku Furstadæmin

Eftir morgunverð förum við í skoðunarferð um höfuðborg Sameinuðu Arabísku Furstadæmana, Abu Dhabi og heimsækjum svokallað Heritage Village þorpið sem er eftirgerð af hefðbundnu eyðimerkurþorpi. Borgin er afar nútímaleg en hefur að geyma marga menningarlega fjársjóði og einstaklega fallegar byggingar byggðar í arabískum stíl eins og höll konungsins, Qasr Al Watan og Sheik Zayed Grand moskuna - sú stærsta í landinu og ein sú stærsta í heiminum.

Við endum daginn á hótelinu okkar í Dubai og borðum kvöldverð þar. Gistum á Signature 1 Hotel.

Morgun- og kvöldverður innifalinn.

Dagur 15 | 18. Október

Áfangastaðir: Dubai, Sameinuðu Arabísku Furstadæmin

Frjáls dagur í Dubai, kvöldverður á hótelinu okkar. Gistum á Signature 1 Hotel.

Morgun- og kvöldverður innifalinn. 

Dagur 16 | 19. Október

Áfangastaðir: Riga, Lettland

Frjáls tími fram að hádegi þegar við förum út á flugvöll fyrir flugið okkar til Riga í Lettlandi, áætluð lending er klukkan. Frjáls tími í Riga það sem eftir lifir dags. Riga er meira en 800 ára gömul miðaldaborg sem er mikið augnayndi hvert sem litið er og gamli borgarhlutinn er á heimsminjaskrá UNESCO. Auðvelt er fyrir gangandi vegfarendur að komast leiðar sinnar í gamla hluta Riga eftir steinilögðum strætum þar sem sagan liggur í loftinu. Víðsvegar um gamla bæinn má finna falleg torg sem hýsa bjórgarða, veitingastaði og kaffihús þar sem er tilvalið að setjast niður og gera vel við sig í mat og drykk. Hótelið er á besta stað, mjög miðsvæðis og nánast hægt að ganga hvert sem er.

Dagur 17 | 20. Október

Áfangastaðir: Riga, Lettland

Frjáls dagur í Riga.

Dagur 18 | 21. Október

Áfangastaðir: Keflavík, Ísland
Flugið okkar frá Riga til Íslands er klukkan 10:45 og við lendum í Keflavík klukkan 11:45.

Morgun- og kvöldverður innifalinn.